Salamaek Datang My ID
 |
| pasombahan |
Ampun kapado niniek mamak nan gadang basa batuah, iyolah urang nan ampek jinih di nagari, pangulu nan saandiko, manti nan sasipek, malin nan sakitek, dubalang nan sadorek, sarato urang tuo-tuo, alim ulamo jo cadiek pandai, suluah bendang dalam nagari.
Sungguahpun nan bak itu, sambah nan indak balupokan, kapado nan duduak sahamparan, nan baselo bajabektan, nan salangkah didaulukan, nan sarantiang ditinggikan.
Lalu pulo ka nan basamo, nan langkok papek kasadonyo, kok gadang indak kadisabuik gala, kok kaciek indak kadisabuik namo, aluran mande ambo pamande, aluran bapak ambo pabapak, aluran kakak ambo pakakak, nan kaciek ambo paradiek, samo gadang lawan baiyo, rila jo mooh ambo pinto.
Adopun sambah nan kan ambo pasambahkan, bak pitua datuak-datuak juo :
Carano bari batagak banamo patah sambilan
Kaba Pusako ambo bukak, rila jo maoh dipintokan.
Ambo malompek nak basitumpu,
mamancang nak basangkalan,
manyaik nak bapamagangan.
Usahlah ambo bak mamungkang balam dalam rambun,
pauah tumbuah di lambah,
buli-buli sangkuiktan puan
ambo datang manyampaikan sambah
di bawah duli mangkuto tuan.
Dibao anak puto-puto, dibao anak sutan-sutan, dibao anak rajo-rajo,
di dalam nagari nan ampek suku.
Dilegakan carano nan ampek, nan duo lalu pado tuan nan ciek latak di tangah
nan ciek tingga dek kami, itulah nan ka untuak niniek muyang.
Adopun carano nantun, lai batirai baantiang-antiang, lai batatah paramato, buektan Singkarak jo Sulik Aie.
Adopun carano nantun, lai barisi salangkoknyo, sirieh udang tampa hari, tampuaknyo manguku balam, buahnyo jarang basuo, batang diambiek ka tinaman,
sabulan dalam pangguluangan, usahkan busuak batambah iduik.
Kok dietong pado pinangnyo, batutuik pinang batutuah, bak dasun dibalah duo, bak bawang dibalah ampek, tumbuah di lereang pasagian.
Urek nan lalu ka sarugo, jelo bajelo di tapian, tingginyo jangkau-jangkauan,
sataun tupai mamanjek, tigo bulan salodang jatuah, baanyo kito mamanjeknyo.
Lai bapanggie ungko jo siamang, mintak izin ka ureknyo, paambiek sado nan paguno, paguno dek kito nan basamo.
Kok dietong pado gambienyo, gambie nan dari Sarilamak, buektan anak Indojati, tuangan ameh jo timbago.
Kok dietong pado sadahnyo, sadah putieh langkitang lawik, dikisa jo pati santan, dituhuak jo aie bungo, sakadam sakati limo.
Kok pandai mamalik sadah, dipalik jo ujuang tunjuak, dikisa jo jari manih, kok tak pandai mamalik sadah, tapalik sakadamnyo.
Durian Siulak baliek,
buahnyo jatuah babelok,
sahariko danak nan baiek,
samalamko kutiko nan elok.
Sirieh baikek jo janji, janji baikek jo buektan.
Tipak nan dari pado itu, saparati sirieh nan sacabiek, pinang nan sagatok, sadah nan sapalik, dek awa kato nan sapatah, tagak dek imbau nan sabuah,
sambah tajelo pek nan rapek , tatabua di tangah-tangah.
Sambah nan kan ambosambahkan, tumbuah sarupo iko kini,
utang dek diri sipangkalan, iyo dek badan diri ambo,
taniek di dalam hati, tangiang-ngiang dipikiran, siang manjadi angan-angan,
malam manjadi buah mimpi.
Adopun nan dipasambahkan, tanun batanam aka budi, sulam sari Minangkabau,
kaba pusako muyang kito, iyolah Kaba Tareh nan disambahkan.
Adopun Kaba Tareh, Kaba Pusako Minangkabau, ado ampek parakaro :
Nan partamo Tareh Batang
nan kaduo Tareh Daulu
nan katigo Tareh Kudian
nan kaampek Tareh Runuik.
Adopun nan dikatokan Tareh Batang
partamo Kaba Datuak Dingalau
kaduo Kaba Sariputi
katigo Kaba Ruhun Jani
kaampek Kaba Datuak Cati.
Tipak kapado Tareh Daulu
partamo Kaba Parapatieh
kaduo Kaba Indojali
katigo Kaba Talago Undang
kaampek Kaba Taruih Mato.
Sauak kapado Tareh Kudian,
partamo Kaba Bukik Siguntang-guntang
kaduo Kaba Ameh Urai
katigo Kaba Batang Hari
kaampek Kaba Indang Bumi.
Nan disabuik Tareh Runuik,
partamo Kaba Cindua Mato
kaduo Kaba Sibaribuik
katigo Kaba Anggun Nan Tungga
kaampek Kaba Gombang Patuanan.
Tipak di danak sahariko, iyo kutiko di malamko,
kaba tareh dilewakan, iyo kapado nan basamo,
bak kato urang tuo-tuo, adaik limbago di galanggang, pakai janang jo juaro.
Namun samantangpun bak itu, tipak ka badan diri ambo, silang nan bapangka, karakok nan bajunjuang, karajo nan bapokok, umua baru sataun jaguang, darah baru satampuak pinang, pandapek alun sabarapo,
maoh jo ampun ambo pinto.
Kok basuo jalan basimpang, caliek tampuah kasadonyo bulieh tau bateh inggannyo.
Bak pitua datuak datuak datuak juo, kok sasek di ujuang jalan, capek kumbali ka pangka jalan, kok sasek di rimbo gadang, capek panjek kayu nan tenggi, tapi kok sasek di gurun nana, takuakan badan sakutiko, kana diri kanalah badan, siapo badan diri nangko.
Jikok ado siapo madokan, jikok duduak siapo manduduakkan, jikok tagak siapo managakkan, alam tardiri Tuhan mambari, dunsanak nan capek maranuangkan, ka langik sanak gantuang tinggi, ka bumi sanak kalikan dalam.
Jikok alah nan bak kian, manyarah kito pado Allah, tagaklah capek basugiro, turuik kamano ampu kaki, kok lai untuang takadie Allah,
kito basuo jo batehnyo.
